TCHAND QU'Y-ARA DES FLEURS AUX LILAS
Tchand qu'y-ara des fleurs aux lilas,
Pou les afants, ch'êtra la fête,
Cha vaudra bin Saint Nicolas,
Tchand qu'y-ara des fleurs aux lilas.
In les verra dins les vo.yettes,
Avec des boutchets plein leus bras.
Tchand qu'y-ara des fleurs aux lilas,
Y-a des afants qui f'ront tcheuette.
Tchand qu'y-ara des fleurs aux lilas,
Tous les pinchons et les fauvettes,
Chuffel'ront leus airs de gala,
Tchand qu'y-ara des fleurs aux lilas.
I bâtiront leus majon.nettes,
In friolant par-chi par là.
Tchand qu'y-ara des fleurs aux lilas,
Tous les ojeaux t'ront in goguette.
Tchand qu'y-ara das fleurs aux lilas,
Su les p'tits bancs in têt' à tête,
Colette imbrach'ra sin Colas,
Tchand qu'y-ara des fleurs aux lilas.
Et les p'tits blonds, les p'tit' brun.nettes,
S'diront : "j't'ain.me bin, in s'mariera."
Tchand qu'y-ara des fleurs aux lilas,
Les amoureux perdront leu tête.
Tchand qu'y-ara des fleurs aux lilas,
In s'appo.yant su leu badgette,
Les p'tits vieux iront à p'tits pas,
Tchand qu'y-ara des fleurs aux lilas.
Mais du printemps, l'premir' risette,
D'leus dernis jours, va sonner l'glas.
Tchand qu'y-ara des fleurs aux lilas,
Pou les p'tits vieux, ch'ra l'dernir fête.
Charles DELEPORTE
